المواصلات في منطقة DMV
المواصلات في منطقة DMV متوفرة بشكل كبير. في هذا المقال، سأحاول إعطاء نبذة عن كل وسيلة متوفرة.
المترو
للتنقل عبر المترو يجب شراء بطاقة المواصلات SmartTrip وتكون إلكترونية عن طريق Apple Wallet او بطاقة يدوية من الة موجودة بكل محطات المترو و يتم تعبئتها من نفس الالة. تسعيرة كل رحلة تُحسب عبر مسافة الرحلة (يعني من اي محطة دخلت و من اي محطة طلعت) و ساعة الرحلة (ساعات الظهر و العصر تكون زحمة فالتكلفة تكون أغلى) و بالغالب ياخذ من 2-5 دولار للرحلة الوحدة. و لا يمكن استعمال البطاقة الا لشخص واحد بحيث اذا تم تمرير البطاقة للدخول من البوابة لا يمكن تمريرها مره اخرى لدخول شخص اخر فمن الضروري ان كل شخص يمتلك بطاقة خاصة. الصورة التالية هي نموذج مكان اصدار البطاقات ومنها يمكن شراء البطاقة او تعبئتها عبر اتباع التعلميات الموجودة على اللوحة الالكترونية.
هناك خمسة خطوط للمترو وجميعها تخدم منطقة واشنطن و فرجينيا، و اذا منطقة السكن بعيدة عن اقرب محطة ميترو مقصودة و تحتاج سيارة فكل المحطات توفر مواقف و سعرها 5 دولار لليوم الكامل. الصورة التالية توضح أسماء المحطات لكل خط من خطوط المترو وأشهر الخطوط استعمالا البرتقالي و الازرق و الرصاصي لانها تخدم المناطق السياحية و الجامعات.
ولطلبة جامعة جورج واشنطن، الجامعة تقدم بطاقة خيار ارخص للي يستعملون الميترو بشكل اساسي و هي U-pass و سعرها 100 دولار للفصل الواحد و لا يتم حساب كم مرة استعملتها (لو تستعملها عشر مرات باليوم رايح جاي ما عندك مشكلة) و تشمل نهاية ايام الاسبوع بعد. وطريقة التسجيل كالتالي:
- تدخل في حساب الطالب GWeb
- تضغط على Student Accounts
- ثم تضغط على Student Account eBill
- ستظهر لك خيارات الخدمات اللي تبي تضيفها للفاتورة اضف U-Pass
- سيظهر لك خيار الدفع و بإمكانك الدفع الان أو لاحقا
بعد اضافتها للفاتورة سيصلك ايميل لتعبئة البيانات و يحددون ايام تروح تاخذ فيها البطاقة. ويمكن اعادة الاشتراك كل فصل من دون تغيير البطاقة او الذهاب للمكتب فقط اضف الخدمة لفاتورة الطالب ويتم التفعيل. و يمكن اضافة البطاقة للApple Wallet لكن بمجرد تكون البطاقة الكترونية راح تنلغى البطاقة اليدوية. وشخصيا اشوفها اساسية للي يستعمل المترو كل ما راح للجامعة بس اللي عندهم سيارة او ساكنين بالسكن الجامعي ما لها داعي.
الباص
احدى خيارات التنقل هي الباصات و طريقة عملها هي أن كل منطقة تخدمها شركة باصات مختلفة فبعضها فيه دفع و بعضها مجاني. اذا فيها دفع فطريقة الدفع عبر بطاقة SmartTrip او كاش و التسعيرة في الغالب 1-2 دولار. نظام الباصات معقد شوي لأن بعض المناطق ما يمر عليها الباص الاّ مره كل ساعة و بعضها كل 15 دقيقة و احيانا المكان المقصود تقدر تاصل له عبر اكثر من باص. بعض الشركات تعطي لباصاتها اسماء (green, yellow, blue) و بعضها ارقام بس و بعضها احرف و ارقام. الطريقة الوحيدة اللي انصح فيها لاي احد يبي يستعمل الباص انه يكتب الوجهة بــ Google map و يختار خيار الباصات وبيطلع له اسم الباص (احيان اكثر من باص بحيث تنزل من الباص الاول وتركب الباص الثاني) بس تأكد انك واقف جنب لوحة وقوف الباص عشان ينتبه لك سائق الباص ويوقف لك.
السيارة
اريح طريقة للتنقل هي امتلاك سيارة و اذا عندك سيارة حط بالك للـ Toll (وهي الطرق الغير مجانية). فيه طرق (في الغالب الطرق السريعة) اقصى اليسار له تسعيرة اذا مريت عليه و تعرف التسعيرة من اللوحات الالكترونية على الشارع و تتغير التسعيرة بتغير الوقت و اليوم و اي مخرج بتطلع منه فمو ثابت و هو ما بين 1-16 دولار. وفي الغالب اذا اللي راكبين السيارة 3 و اكثر ما يحسبون التكلفة فيكون مجاني و تعرف اذا هذا الشرط مطبق عبر لوحة HOV3+ و احيانا تكون اللوحة HOV2+ فمعناته اذا الركاب 2 و اكثر مجاني. الصورة التالية هي للوحة الكترونية توضح تسعيرة الشارع ويظهر ثلاث تسعيرات فالاول عند الخروج من مخرج I-66 التسعيرة 0.90 و هكذا.
في ما يخص المواقف فهي في الغالب متاحة في كل مكان و مجانية لكن في واشنطن الموضوع مختلف. المواقف اللي عالشارع لها تسعيرة في الغالب 5 دولار للساعتين و بعد الساعة ٧ بالليل عادةً مجاني (ضروري تقرأ اللوحات و هل هو مسموح بالوقوف او لا). الصورة التالية مثال للوحات اللي يجب الانتباه لها قبل الوقوف وهي ممنوع الوقوف من يسار اللوحة و مسموح الوقوف من اليمين بحد اقصى ساعتين (ويوضح الوقت المسموح في الوقوف)
وطريقة الدفع عند كل مجموعة مواقف فيه الة تحط فيها كم المبلغ اللي بتدفعه و يقابله كم ساعة مسموح لك بالوقوف مثل الصورة التالية (يختلف شكلها من مكان لمكان بس في الغالب عليها حرف P)
وفيه طريقة ثانية انا افضلها عبر تحميل تطبيق ParkMobile يطلّع لك اقرب مكان متاح تقدر توقف فيه بدال ما تدور و تقدر تدفع عن طريق التطبيق و اذا دفعت لساعتين مثلا و تبي تمدد ما يحتاج ترجع للسيارة تقدر تمدد من التطبيق.
